1.ನಾನ್ಯಾರು ನಿನಗೆ ಎಂದು ನೀ ಕೇಳದಿರು ಮತ್ತೆ ಮತ್ತೆ
ನೀನು ನನ್ನ ಮನದ ಅಂಧಕಾರವ ಅಳಿಸಿದ ಪ್ರೇಮದ್ಹಣತೆ
ಬತ್ತಿದ ನನ್ನೆದೆಯ ಭಾವನೆಗಳಿಗೆ ಒಲವಿನ ಒರತೆ.


2.ಮರೆಯಬೇಕೆಂದೇ ನಿನ್ನ ಮತ್ತೇರುವಷ್ಟು ಕುಡಿದೆ
ಮತ್ತಿನಲ್ಲೂ ನಿನ್ನ ಹೆಸರನೇ ತೊದಲಿದೆ.
ಕನಸಾಗಿ ಕಾಡುವೆ ನೀ ನಿದಿರೆಯಲೂ ...
ಚಿರನಿದ್ರೆಯೇ ಬೇಕೇನೋ ನಿನ್ನ ನೆನಪಾಗದಿರಲು.

3.ಕದ್ದಿದ್ದಾನೆ ನನ್ನ ಹೃದಯ
ತುಂಬಾ ತಡವಾಗಿ ಅರಿವಾಗಿದೆ
ಕದ್ದವನು ಇಲ್ಲೇ ಎಲ್ಲೋ ಇದ್ದಾನೆ
ಹಾ!! ಅವನೇ ಇರಬೇಕು ಗುಮಾನಿ ಇದೆ
ಚಹರೆ ಹೀಗಿದೆ---
ಶ್ಯಾಮಲವರ್ಣ, ಎತ್ತರ ನಿಲುವು
ಹರವಾದ ಎದೆ, ಆಜಾನುಬಾಹು
ದುಂಡನೆಯ ಮೊಗ, ತಿದ್ದಿಟ್ಟ ತುಟಿಗಳಲಿ ಮುಗುಳ್ನಗು,
ಮೆಲುಮಾತು ಗಂಭೀರ
ಹೌದು, ಅದೇ ಗೊಮ್ಮಟನ ತೆರದಿ ಶಾಂತಭಾವ
ನಾನೇ ಕೊಟ್ಟೆನೋ? ಅವನೇ ಕದ್ದನೋ?
ಹೋಗಲಿ ಬಿಡಿ ಹುಡುಕಬೇಡಿ ಯಾರೂ. ...
ನನ್ನ ಹೃದಯ ಅವನಲ್ಲೇ ಇರಲಿ.