ಗತದ ಕಹಿಯ ಮರೆತುಬಿಡು ಎಂದು 
ಎನ್ನ ಕಣ್ಣುಗಳಿಗೆ ಮುತ್ತಿಟ್ಟೆ ..... 
ಮರೆತೆ ನಾ ಕಣ್ಮುಚ್ಚಿ ಗತವ.... 
ಅ ಸುಖದಿ ಮರೆತೆ 
ಮುಂದಿನ ಭವಿಷ್ಯವನ್ನೂ ಸಹ 
ಈಗ
ಯಾವುದೇ ಅಸೆ ಕನಸುಗಳಿಲ್ಲ ನನಗೆ ನಿಜ ...
ಚಂದ್ರ ತಾರೆಗಳ ತಂದು ಮುಡಿಸು ಎನಲಾರೆ...
ನಿನ್ನ ವ್ಯಕ್ತಿತ್ವದ ಹಿರಿಮೆಗಿಂತ
ಬೆಟ್ಟ-ಗುಡ್ಡಗಳೂ ಕಿರಿದು
ನಿನ್ನ ಹೃದಯ ವೈಶಾಲ್ಯತೆಗಿಂತ
ಸಾಗರವೂ ಚಿಕ್ಕದು
ಸಾಗರ, ಬೆಟ್ಟ ಗುಡ್ಡಗಳ ಸುತ್ತಿಸು ಎನ್ನುವುದಿಲ್ಲ....
ಇರುವ ನಾಲ್ಕಾರು ದಿನ
ನನ್ನೊಂದಿಗೆ ಅನುಕ್ಷಣವೂ ನೀ ಜೊತೆಯಾಗಿರು
ಎಂದು ಹೇಳುವಾ ಸ್ವಾರ್ಥವೂ ನನದಲ್ಲ
ಸಾಧ್ಯವಾದರೆ ಒಂದಷ್ಟು ಸಮಯ ಕೊಡು
ತುಸು ಹೊತ್ತು ನಿನ್ನೆದೆಗೆ ಒರಗುವೆ
ಮೆಲುದನಿಯಲಿ
ಹಾಡೊಂದ ಹಾಡಿಬಿಡು ನನಗಾಗಿ
ನಾನು ನಿದ್ರಿಸಬೇಕಿದೆ ಎಲ್ಲವನೂ, ಈ ಪ್ರಪಂಚವನೆ ಮರೆತು ......
ಭೂತ-ಭವಿಷ್ಯದ ಗೊಡವೆ ಮರೆಸುವ
ನಿನ್ನೊಡನೆಯ ವರ್ತಮಾನದ ಸುಖ ಸ್ಥಿರವಾಗಬಾರದೇ ನನ್ನೊಲವೇ ?