ಕಣ್ಣನ್ನು, ಮೂಗನ್ನು, ನಗುವನ್ನು, ಮೊಗವನ್ನು, ನಿಲುವನ್ನು, ಬಣ್ಣವನ್ನು, ಮಾತನ್ನು ..... ಅದಕ್ಕೆ ಇದಕ್ಕೆ ಹೋಲಿಸಿ ಎಂದಾದರೊಮ್ಮೆ ವರ್ಣಿಸುತ್ತೇನೆ ಬಿಡ್ರೀ . ಹೆಸರೂ ಕೊಡ ಅದೆಷ್ಟು ಮೋಹಕ !!! ಅವರಪ್ಪ ಅಮ್ಮನಿಗೆ ಥ್ಯಾಂಕ್ಸ್ ಹೇಳಬೇಕು. ಅವನು ಸಿಕ್ಕಾಪಟ್ಟೆ ಚೆಲುವ !!! ಇಷ್ಟೇ ನಂಗೆ ಈಗ ಹೇಳೋಕೆ ಬರೋದು. ನಾನು ಅವನಿಗೆ ಮರುಳಾಗಿದ್ದರಲ್ಲಿ ಹೆಚ್ಚುಗಾರಿಕೆ ಏನಿಲ್ಲ.ನಾನು ಅವನ ಚೆಂದದ ೧% ಊ ಚೆನಾಗಿಲ್ಲ , ನಂಗೊತ್ತು . ಆದರೆ ನಂಗೆ ಅವನು ಹೆಂಗೆ ಫ್ರೆಂಡ್ ಅದ ! ತುಂಬಾ ಹತ್ತಿರನೂ ಆಗ್ಬಿಟ್ಟ! 
ಹೀಗೆ ಮಾತಾಡ್ತಾ..... ಮಾತಾಡ್ತಾ ಒಮ್ಮೆ .... 
ನಾನು ರೌಡಿ ಗೊತ್ತಾ ? ಎಂದ. ನಮ್ಮೂರಲ್ಲಿ ನನ್ ಕಂಡರೆ ಭಯ .. ಹಾಗೆ ... ಹೀಗೇ ... ಸ್ವಲ್ಪ ಬಿಲ್ದಪ್.
ನಾನು ನಕ್ಕೆ, ಓಹೋ ! ಹೌದ ! ನೀನು ಸುಂದರಾಂಗ ಅಂತ ಗೊತ್ತು , ರೌಡಿಸಂ ಬೇರೆ ಉಂಟಾ ? ಹಾಗಾದ್ರೆ ಇನ್ನೂ ನಂಗಿಷ್ಟ ಬಿಡೋ ಎಂದೇ.
ಕಟ್ಟುಮಸ್ತಾದ ದೇಹ, ಜೊಂಪೆ ಕೂದಲು, ಚೂರೂ ಹೊಟ್ಟೆ ಡುಮ್ಮ ಇಲ್ಲ. ಇಷ್ಟು ವಯಸಾದ್ರೂ..... ಆಹಾ ಮನ್ಮಥ! ಎಂದು ಮನದಲ್ಲೇ ಬಯ್ಕೊಂಡು ನಗಾಡಿದೆ.
ಸರಿ ಹಾಗಾದರೆ-- - ಕಣ್ಣು ಹೊಡಿಯೋಕೆ ಬರುತ್ತಾ ನಿಂಗೆ ? ಇಂಟರ್ವ್ಯೂ ಶುರು ಮಾಡಿದೆ.
ಎರಡೂ ಕಣ್ಣುಗಳ ಮಿಟುಕಿಸಿದ.
ನಗೂ ನನ್ನದು ಮತ್ತೆ . ನೋಡೋ ಹೀಗೆ ಎಂದು ನಾನು ಕಣ್ಣು ಹೊಡೆದು ತೋರಿಸಿದೆ.
ಈಗ ಶೀಟಿ ಹೊಡಿ ನೋಡೋಣ ಅಂದೆ.
ಅಷ್ಟೇನೂ ಜೋರಾಗಿ ಬರೋಲ್ಲ ಎಂದು ನಿಧಾನಕ್ಕೆ ಹೊಡೆದ.
ಬಾಯಿಗೆ ಬೆರಳು ಇಟ್ಟು ಜೋರಾಗಿ ಹೊಡೆಯಬೇಕಪ್ಪಾ, ಅಷ್ಟೊಂದು ಫಿಲಂಸ್ ನೋಡ್ತೀ ? ನಾನು ನೋಡು ವಿಶಲ್ ಲಿ ಹಾಡು ಹೇಳ್ತೀನಿ ಗೊತ್ತಾ ? ಎಂದೇ.
ಹೋಗಲೀ ಸಿಗರೇಟ್ ?
ಉಹುಂ ನನಗೆ ಹೊಗೆ ಇಷ್ಟವಾಗೋಲ್ಲ, ಆದರೆ ವೀಕ್ಲಿ ಒನ್ಸ್ ಬೀರ್, ಸ್ಕಾಚ್ ಕುಡೀತೆನೆ. ನಾ ಕೇಳದಿದ್ದರೂ ಅಂದ.
ಅಬ್ಭಾ ಸಧ್ಯ ಕುಡೀತಿಯಲ್ಲಾ !!! ಕುಡಿದಾಗ ರೋಮ್ಯಾಂಟಿಕ್ ಆಗಿ ಇರ್ತೀ ತಾನೇ ? ಎಂದು ಕಿಲಾಡಿ ನಗು ನಕ್ಕೆ. ಸಿಗರೇಟ್ ಬೇಡಾ ಬಿಡೂ, ನಿನ್ನ ಕೆಂದುಟಿಗಳು ಹಂಗೆ ಇರಲಿ, ಚೆಂದ ಉಂಟು ಎಂದೆ .
ಕಾರ್ಡ್ಸ್ ಆಡ್ತೀಯಾ ?
ರಮ್ಮಿ ಸ್ವಲ್ಪ ಬರುತ್ತೆ, ಆದರೆ ದುಡ್ಡು ಕಟ್ಟಿ ಆಡೋಲ್ಲ ಅಂದ.
ಹೇಯ್ ನನಗೆ ಚೆನ್ನಾಗಿ ಬರುತ್ತೆ, ನಾನು ಹೈ ಸ್ಕೂಲ್ ಏಜ್ ನಲ್ಲೆ ಕಲಿತಿದ್ದೇನೆ ಗೊತ್ತಾ ?ಡೋಂಟ್ ವರಿ , ಕಲಿಸ್ತೇನೆ ಬಿಡೂ, ನಾವಿಬ್ಬರೇ ಇರೋವಾಗ ಆಡೋಣ ? ಮೋಸ ಮಾಡೋಲ್ಲ, ನಿನ್ನೆ ಗೆಲ್ಲಿಸ್ತೇನೆ ಎಂದೆ.
ಚೆಲುವ ಎಷ್ಟು ಹುಡ್ಗೀರ್ ನ ಪಟಾಯಿಸಿದ್ದೀ ? ಎಷ್ಟು ಗರ್ಲ್ ಫ್ರೆಂಡ್ಸ್ ನಿನಗೆ ?
ದೇವರಾಣೆ ಯಾರಿಲ್ಲ, ಇಷ್ಟೊತನಕ ನಿನ್ ಜೊತೆಗೆ ಇದ್ದೇನೆ , ಯಾರದ್ದಾದರೂ ಫೋನ್ ಬಂತಾ ? ಚಾರ್ಜ್ ಬೇಗ ಹೋಗೋದಿಲ್ಲ ನನ್ ಸೆಲ್ಲ್ ನಲ್ಲಿ, ಯಾರಗೂ ಅನಾವಶ್ಯವಾಗಿ ಮಾತಾಡೊಲ್ವೆ ... ಕನ್ವಿನ್ಸ್ ಮಾಡೋಕೆ ಪ್ರಯತ್ನಿಸಿದ ಪಾಪ.
ನಾನು ನಂಬೋಲ್ಲ ಬಿಡೂ ಎಂದೆ.
ರೌಡಿ ಅಂತೆ ರೌಡಿ ??? ಸುಮ್ನೆ ಬಿಲ್ದಪ್ ಕೊಡ್ತಾನೆ. ಹೋಗಲಿ ಬಿಡಿ, ನನ್ನ ಮನಸನ್ನು ಕದ್ದಿದ್ದಾನೆ ಕಳ್ಳ . ನನ್ನಲ್ಲಿರುವ ಎಲ್ಲವನ್ನೂ ದೋಚಿದ್ದಾನೆ, ದರೋಡೆಕೋರ. ಏನೇನ್ ಮುದ್ದಾಗಿ ಬಯ್ದುಕೊಳ್ಳಲಿ ??? ನನಗೆ ತುಂಬಾ ಇಷ್ಟವಾಗಿಬಿಟ್ಟಿದ್ದಾನೆ.
ನನಗೆ ಬೇಕಾದ ಹಾಗೇ ನಾನೇ ಅವನನ್ನು ಬದಲಾಯಿಸಿಕೊಳ್ಳುತ್ತೇನೆ. ಬೇಡ ಬೇಡ .... ಇಲ್ಲಾ ಅವನ್ಹೇಗೇ ಇರಲಿ, ನಾನೇ ಹೊಂದಿಕೊಳ್ಳುತ್ತೇನೆ ಏನೀವಾಗ ... ???
ಪ್ರೀತಿಯೇ ಹಾಗೇ ..... ಸದ್ದಿಲ್ಲದೇ ನುಸುಳುವುದು. ನನ್ನನ್ನೂ ಬದಲಾಯಿಸುವುದು !!!!
ಪ್ರೀತಿಯೆಂದರೆ---ಸದ್ಗುಣಗಳ ಮೆಚ್ಚುವುದಷ್ಟೇ ಅಲ್ಲ, ನ್ಯೂನತೆಗಳನ್ನೂ ಒಪ್ಪಿಕೊಳ್ಳುವುದು.
ಪರಸ್ಪರರನ್ನು ಬದಲಾಯಿಸದೆ..... ಇರೋದನ್ನು ಇರೋ ಹಾಗೆ ಒಪ್ಪಿಕೊಂಡು ಅಪ್ಪಿಕೊಳ್ಳುವುದು.