"ನನ್ನ ಪುಟ್ಟ "

ನನ ಕಂದನಂತೋರು ಹನ್ನೆರಡು ಮಕ್ಕಳು ,
ಹೊನ್ನೆಯ ಮರದಾ ನೆರಳಾಗೆ ,
ಹೊನ್ನೆಯ ಮರದಾ ನೆರಳಾಗೆ ಆಡುವಾಗ ,
ಸನ್ಯಾಸಿ ಜಪವ ಮರೆತಾನು .
ಗನ್ ಬೇಕು ಅಂತಾ ಹಠ ಮಾಡ್ತಿದ್ದ ನನ್ ಪುಟ್ಟನಿಗೆ ಒಂದು ಗನ್ ತಂದುಕೊಟ್ರೆ ,ಸಿಕ್ಕಾಪಟ್ಟೆ ಖುಷಿ ಆಯ್ತು .
ಪಟಾಕಿ ಹೊಡೆಯೋದು ಪಲ್ಯೂಶನ್ ಅಂತಾ ಮಗಳು , ದೀಪ ಬೆಳಗಿಸುವೆ ಅಂದಳು .ಹಚ್ಚಿದೆವು .
ಹೊಸ ಮನೆಯಲ್ಲಿ ಆಕಾಶಬುಟ್ಟಿ ತೂಗಿಬಿಡುವ ನನ್ನ ಕನಸೂ ನೆರವೇರಿತು .
ಮನೆಯ ಹಿರಿಯರ ಸಂತೋಷಕ್ಕಾಗಿ ಒಬ್ಬಟ್ಟು ಮಾಡಿದ್ದಾಯ್ತು .
ಒಂದು ಸಾವು

 ,ಒಂದು ಅನಾರೋಗ್ಯದ ನೋವು ಎಲ್ಲವನ್ನೂ ನುಂಗಿಕೊಳ್ತಾ .......
ಪಟಾಕಿ ಬೇಕೇ ಬೇಕು ಅಂದ ತಮ್ಮನಿಗೆ, ಹೊಡೀಬಾರ್ದು ಕಣೋ ಪುಟ್ಟಾ ಅಂತಾ ಅಕ್ಕ ಬುದ್ದಿ ಹೇಳಿದ್ರೆ ,ಈ ಅಕ್ಕ ಬೇಯ್ತಾಳೆ ,ಅವ್ಳು ನಂಗೆ ಬೇಡ ,ಗಂಡನ ಮನೆಗೆ ಕಳಿಸೂ ಅಂತಾ ಪುಟ್ಟ ರಿಷಿ ಕೋಪಿಸ್ಕೊಳ್ತು .
ಸರಿ ಡಂ ಅನ್ನದ ಪಟಾಕಿನೂ ತಂದಾಯ್ತು .
ಥ್ಯಾಂಕ್ ಯೂ ಅಪ್ಪಾ , ಬಹುತ್ ಖುಷ ಹುವ ,ಎ ಕಮಾಲ್ ಕ ಧಮಾಲ್ ಹೇ .....(ದೇವರಾಣೆ ಗೊತ್ತಿಲ್ಲ , ಅರ್ಥ ಕೇಳಬೇಡಿ ) ಅಂತಾ ಪುಟ್ಟ ಖುಷಿಯಲ್ಲಿ ಕುಣಿದಾಡಿತು .
ವಿಷ್ಯ ಅದಲ್ಲ ,
ಪಟಾಕಿ ಹಚ್ಚುತ್ತಾ ,ಪಟಾಕಿ ತರಹ ಮಾತಾಡ್ತಾ ಓಡಾಡುತಿದ್ದ ಮಗ .ಆಚೆ ಸೈಟ್ ನಲ್ಲಿ ಗುಡಿಸಲಲ್ಲಿರೋ ಮಕ್ಕಳು ನಿಂತು .ನೋಡ್ತಾ ನಗುತಿದ್ವು .ಉರಿಯದೇ ಹೋದ ಟುಸ್ಸ್ ಹೂವಿನ ಕುಂಡವನ್ನು 'ನಮಗೆ ಕೊಡೀ 'ಅಂತಾ ಕಿರುಚುತಿದ್ವು .
ಹಚ್ಚಿದ್ದು ಸಾಕು ಅಂತಾ ಒಳಗೆ ಬಂದ್ವಿ .
ಪುಟ್ಟ 'ಇನ್ನೂ ಬೇಕು ನನಗೆ 'ಅಂದ .ನಾನು ಗಮನಿಸಲಿಲ್ಲ .ಕೈಯಲ್ಲಿ ಪಟಾಕಿ ಹಿಡಿದು ಆಚೆ ಓಡಿದ .(ನಮ್ಮದು ಫಸ್ಟ್ ಫ್ಲೋರ್ .)'ಕ್ಯಾಚ್ ಇಟ್ ' ಎಂದು ಎಸೆದ . ಕೆಳಗೆ ಬಿದ್ದ ಪಟಾಕಿಯನ್ನು ಮಕ್ಕಳು ಖುಷೀಲಿ ಎತ್ಕೊಂಡ್ ಓಡಿದವು .
ಎಷ್ಟು ಹಠ ಮಾಡಿ ತರಿಸಿಕೊಂಡ ಪಟಾಕಿಯನ್ನು ,ಬೇರೆ ಮಕ್ಕಳೊಂದಿಗೆ ಹಂಚಿಕೊಂಡ ನನ್ನ ಮಗನ ಬಗ್ಗೆ ನಿಜಕ್ಕೂ ಹೆಮ್ಮೆ ಆಯ್ತು .
ನಾನು ಕಲಿತಿದ್ದು -
೧.ನಮಗೆ ಎಷ್ಟೇ ನೋವಿರಲಿ ಮಕ್ಕಳು ಮರೆಸ್ತವೆ .
೨.ಖುಷಿಯನ್ನು ಹಂಚಬೇಕು .
ಮಕ್ಕಳ ದಿನದ ಶುಭಾಶಯಗಳು :-)